THEIGEWIES

Jaorgank: 2024

Stayin' Alaaf!

Jesse & Jesse wólle nog eine keer mitdoon aan ’t LVK. Quinn bedach de meziek en ’t doerde ein paar daag pès Paul-Jean en ich hie ein beeld bie krege. Disco! Mit de naodrök op wieste alleney kèns bewaege. Twerke wie ein verke en sjöddele mit die prie. Veur de hauve finale leite veer ós inspireiere door ’t duo ‘Modern Talking’.

Koeplet 1:

Es de beats hie aan ‘m riete

Óm de bein ómhoog te sjmiete

Gaon veer sjtampe ónger klamme discolampe…

Op dae sjtrakke hakketakke

Zits-te helemaol gebakke

Dit is sjónkele mit vónke. Heur ’t bónke!

Doe wits van te veure: Noe geit ‘t gebeure

De waeke van: Stayin’ Alaaf!

Refrein:

Veer gaon oette plaat!

Same lekker danse,

Grote kans bie eine flans dat ich mich gans besjeur

Dree dich wie ein raad

Man dan kèns-te glanze

Maak neit wie dao is ’t hie toch vastelaovend veur

Sjöddel mit die prie. Sjöddel nóndepie

Sjöddel mit die pens en dance dance dance dance

Stayin’ alaaf!

Koeplet 2:

Wils-te twerke wie ein verke?

En dien zjaene neit beperke.

Door de huuke wie ein kuuke Moshpit duuke…

Doe geis sjtraole op dien zaole

Maot platoo mós doe dich haole

Lekker hange aan de sjtange en headbange.

Doe wits van te veure: Noe geit ‘t gebeure

De waeke van: Stayin’ Alaaf!

Sjlot:

Sjöddel mit die prie. Sjöddel nóndepie

Sjöddel mit die pens en dance dance dance dance

Sjöddel mit die prie. Sjöddel nóndepie

Sjöddel mit die pens en hah hah hah hah haa

Stayin’ Alaaf!

Vastelaovend is mien dèngk

‘Vastelaovend is mien dèngk’ woord gesjreve veur ’t KVL 2020 mer bleef vanwaege corona op de plank ligke. Daonao is ’t leidje nog bie ‘deze en gene’ langs gewaes. In de toeloup nao ’t KVL 2024 vroug ’t besjtuur of ich nog leidjes haw ligke. Zie hawwe ’t plan opgevat óm te gaon bemiddele tössje sjrievesj en kènjer die ein leidje zóchte. En zo landje dit leidje via Suze Wolffs eine kilomaeter wiejerop in Lömmerich. Yvonne, ein van de modesj, koosj ich nog van ’t Bloumecorso oet de jaore 90. Guus Kitzen van Kartoesj is mit de maedjes aan de sjlaag gegange. Waat eine grui in zo’n paar waeke!  28 januari waar de finale in Heel. Ich mirkde dae naomiddig vanzelf dat Sam, Saar en Lola ’t KVL gewónne hawwe. Dae haw ich effe neit zeen aankómme.

Refrein:

Vastelaovend is mien dèngk

Hie is fees in eine wènk

En ich sjees d’r knoerhel in

Vastelaovend, waat höb ich zin!

Vastelaovend is mien dèngk

Waat ein sirk hie oppe plenk

En ich mirk al in april:

Vastelaovend is waat ich wil!

Koeplet 1:

Druim mer lekker miene druim in

Gekke sjpas dae kómme geit

En de res kènt mich de buim in

Miene jas hingk al gereid

Mer ich bèn nog eigelik neit muig

In d’n tied pès mörgevruig

Koeplet 2:

Noe bèn ich neit aaf te kuile

En mien bèd zjweef door de lóch

Dao ligk ich dan in te wuile

Dat is vèt mer neit genóg

Went ich vleig nao gekke feeste haer

Es ich mörge wakker waer

Brök:

Kump de pap óm zös oer heyvesj

Zaet de mam: “Gank sjlaope, doe zeivesj”

En waat druim ich dan (2x)

En waat druim ich lekker dan:

Op de Sjwienswei

Ich wól gaer èns ein leidje make in de sjtiel van “Jozef Puime”, “Miss Amanda” of de Vief Naze. Waal euver ein Zittesj actueel thema mer daobie neit vervalle in Zittesje cliché’s. De perikkele róndjóm de Sjwienswei waar ein dankbaar thema. Meininge waere in ‘t leidje in ’t midde gelaote mer ’t is óngetwiefeld ein van mien creatiefste tekste van de lètste jaore. Paul Ruigt zóng ’t leidje in de finale van de Leidjesaovend op 23 september 2023. Via Radio Nónnevot koume heel väöl sjtömme bènne mer ’t leidje eindigde op de 4^e plaatsj.

Koeplet 1:

Eine knien dae zóch ein hoes. Grouf teen läöker veur de voes

Get wie kaolemiene. ‘t Waar geine fiene

Och waat woonde hae dao gaer. Kóm dan gaon veer ouch èns d’raer

Es de zón geit sjiene in ‘t lentewaer…

Refrein:

Dao op de Sjwienswei sjtraole de sjterkes

Dao op de Sjwienswei sjlaope de verkes

Doe wils niks misse van de blömpkes en de sjtruuk die lekker ruke

Dao kènste pisse achter bömpkes of doe zèts dich oppe huke

Dao op de Sjwienswei dao is ’t sjoon

Mer mit de vastelaovend is dao wiejer gaaroet niks te doon

Op de Sjwienswei. Op de Sjwienswei

Loup èns nao Tudder door d’n tódder van de Broukzittesje klei

Koeplet 2:

Emes mit ein grote zaeg koum d’n Tud-waeg opgevaeg

En dae knien mer kwake: “Dat kèns doe neit make”

Hae reip doe mit sjtampende vuit. Vreef häöm ouch nog ónger die kuit:

“Waat zeen dit veur zake hie in Mille-Zuid?”…

Koeplet 3:

Mer dae knien dach: “Krieg ‘t zoer miene awwe Hateboer

Bènne ein paar jaore geit dien gruin verlaore”

Noe woont hae hie óm de houk in de wei van Glanerbrouk

Krig dao grieze haore en ruip mit gevlouk…

Loat de Leedjes Leave

Via ein mezikaal projek óntsjtóng dit leidje euver ’t gebroek van dialek in vastelaovesleidjes. Ein heel actueel thema in 2023. ’t Projek góng neit door mer ’t leidje waar waal al vaerdig. Tiejes ’t OLS 2023 in Bor tróf ich nao de optoch bie ’t opgaon nao de sjöttewei Peter Francot van ’t duo Pier & Stuf oet Baexem. Die hawwe nog gein LVK leidje veur 2024, en ich dus waal. Ich haw al èns ein leidje veur hun gemaak in 2020 en van ’t ein koum ’t anger.

Refrein:

Loat de leedjes leave in dien eige dialek

Zing mer mèt! Zeng mar met! Zing maar mei!

Giga gaas goan geave en genete wie ‘ne gek

Dootj mer mèt! Doeg mar met! Doog maar mei!

Det zeen de klanke van Eijsde tot de Mokerhei HEY! HEY!

Loat de leedjes leave in dien eige dialek

Zing mer mèt! Zeng mar met! Zing maar mei!

Koeplèt 1:

Wea besjloate geniaal oét ein Limburgs ideaal

In de eige wöärd te dichte van ós moderstaal

Mer zónger “Na NaNaNaa” “Na NaNaNaa”

Zeen biej Veldeke geweas op de cursus “Sjriéf en leas”

En doa lieërdje ze ós dichte vöär de polonais

Mer zónger: “La Lalalaa” “La LaLaLaa”

Woea is dea allerbèste leedjesman

Dea ós dit vasteloavesleedje make kan?

Koeplèt 2:

Weardj dit leedje literear? Geit de clou nog örges hear?

Want wea zeuke noe al weake in d’n Dictionear

Mer neet noa: “Oh HoHoHoo” “Oh HoHoHoo”

Zeen de wöärd van eige heim? Sjteit de ganse kroam op rijm?

Is d’n teks super geweldig en nog gans geheim?

Dus neet van: “Jo JoJoJoo” “Jo JoJoJoo”

Woea is die allerbèste leedjesmeid

Die ós dit vasteloavesleedje make geit?

Brök:

Dus wilse lekker zinge

Onthoadj dees wiéze les:

Verloochen noeats de plaats woea se geboare bès