Jaorgank: 2023
'n Leedsje van niks
Ich leip al jaore róndj mit ’t idee óm ein leidje te make dat heel ‘sjlech’ waar. Dat eigelik allein mer gemeind is veur luuj die gaaroet neit van de vastelaovend hawte. Tiejes de LVK finale van 2022 haw ich al kóntak mit lede van de Kloomp euver dit idee. Oeteindelik hakde Luc Volders in de zomer van 2022 de knoup door. Mesjiens ouch waal ómdat ze zelf niks baetsesj hawwe. ’t Idee óm mich zelf tiejes ’t nómmer te laot ontsjlaon. Jao dao koosjte ze waal get mit. ’t Waar in jeder geval ein leuke samewirking en de opnames bie Marlstone ware veur mich ein unieke muziekale ervaring…
Koeplet 1:
Dit leedsje is veur luuj die zokke zuime
En ezele die rechop sjtoon te druime
Die oetgesjtreke oet hun naze vrete
En gapentere alles flot vergete
Die es veer blaere drek nao boete goon
En die mit dit leedsje gaaroet niks goon doon…
Refrein:
Dit is ein leedsje van niks
’t Waor al op de rand meh dit löp oet de hand
Dit is ein leedsje van niks
De stumming is genant geliek al aafgebrand
De sjriever höbbe veer ôntsjlage
De ellende is neet te verdrage
Väöl te flot um vief veur twellef aafgemix
Dit is ein leedsje van niks
Koeplet 2:
Dan höbste ouch nog van die sjlappe happe
En zeiverzèk die bie ôs grappe kappe
De zäödjes en de meuge Sinterklaoze
En lapzjwens die mit ôs neet wille raoze
De lepsjmoel en dae voele prèngelaer
Nae, die zinge allemaole neet zwa gaer…
Brök:
Wae haet bezope aan de knup gezete?
Waor dit ein dwaling van de arransjeur?
Wae is de vastelaoves-sjmaak vergete?
En warum sjteit dit sjtökske in mineur?
Plaatsj: | Meerssen |
Teks & Meziek: | Thei Wessels, Luc Volders |
Zangk: | De Kloomp |
LVK 2023: | Hauve finale |
Media: | "Van Eijsde tot de Mookerhei" Deel 30 (Marlstone C202301, 2023) |
Kóm derbie!
Ich zoug ein documentaire op TV euver emes in Limburg dae aw muziekinsjtrumènte verzamelt. Hae haw tsj de lètste jaore väöl opgekoch van ter zele gegange vereiniginge. Claire is betrokke bie de neudige vereiniginge wo ónger Star Light in Elsloo en wit wie lestig dat ’t is óm de geledinge gevöld te hawte. ’t Leidje sjtraolt oet wie gezèllig dat ’t bie ein vereiniging kènt zeen. Dat dat ein veilige plaatsj is woste dichzelf kèns zeen en vrunj veur ’t laeve maaks.
Refrein:
Kóm derbie! Dao zeen hie kómpenieje zat
Kóm derbie! Veer zeen de gekste van de sjtad
Kóm derbie! Noe loup de deur bie ós mer plat
Kóm derbie! Zwa good bès doe al ingesjat!
Kóm mer bènne. Effe wènne
Aan de res wurd waal gesjaaf
Kóm van die bank aaf!
Want same wurd dit gaaf
Koeplet 1:
‘t Klupke mit vaere, de zate hermenie
Ein trupke reigelaere die trèkke hie veurbie
Mer de groepe en de wageboewesjbuurt
Die höbbe hun troepe en de oproop al versjtuurd
Koeplet 2:
De sjötte, auw wiever, de raod en de fanfaar
Die pötte oet de viever van nuje ledesjaar
Maak de trómme, träöte en besjtuur kómpleet
Ze zeen dich gaer kómme en dus sjaam dich noe mer neet
Brök:
Kóm derbie! Nuuj lede versjterke de rie
Kóm derbie! ‘t Is nurges zwa gezèllig es hie
Sjlot:
Noe kóm èns opgedraaf
Alaaf! Alaaf! Alaaf!
Plaatsj: | Aelse (Elsloo) |
Teks & Meziek: | Thei Wessels |
Zangk: | Claire |
LVK 2023: | Hauve finale |
Media: | "Van Eijsde tot de Mookerhei" Deel 30 (Marlstone C202301, 2023) |
Sjtaek dien naeske in ‘n glaeske
‘Sjtaek dien naeske in ’n glaeske’. Zo get sjteit op miene tillefoon ónger de categorie leuke ideekes. ’t Leidje in uptempo 6/8e marsj is gebaseierd op eige ervaringe mit mindfullness en óntsjpanne. Get waat verdöld lestig is. De vastelaovend is aevel ouch ein goud momènt in ’t jaor óm de reset knóp èns effe in te duje.
Koeplèt 1:
Alle manne en madamme make planne te óntsjpanne:
Jow Jooow! Jow Jooow!
Op ein metje en ein kretje aan ’t beffètje. Gaef ‘m van Jètje!
Jow Jooow! Jow Jooow!
Van dae yoga wurste heerlik zen
Aan d’n toog Alaaf! mit alle men…
Refrein:
Sjtaek dien naeske in ‘n glaeske
Zèng de leidjes van de lach en van de traon
Jeder vaeske is ’t haeske
Es v’r same alle zörg laote gaon
Sjtaek dien naeske in ‘n glaeske
Sjprèng èns d’roet in plaatsj van aan te blieve sjtaon
Jeder vaeske is ’t haeske
In de lesse “Sjtop mit sjtresse”
Es v’r same alle zörg laote gaon
Koeplèt 2:
Ammezase! Hoog de glaze! Veer doon naze meditase:
Jow Jooow! Jow Jooow!
Niks kènt tippe aan die hippe dröpkes nippe taege de klippe
Jow Jooow! Jow Jooow!
Zuik mer wiejer nao dien yin en yang
Mer bès ouch neit veur ein feeske bang…
Brök:
Zo vènje veer hie mindfull dees ideekes
Ós vastelaovesmantra aan de teekes van kefeekes en foyeekes
Sjlot:
In de lesse “Sjtop mit sjtresse” van die van Jesse
Waat ein suksesse…
Es v’r same alle zörg laote gaon!
Helle Decibelle
Door Corona bleef dit leidje ènnige jaore op de plank ligke bie Studio Veier. Ouch de samesjtèlling van Veier-G wisselde in dees periode. Dankzij de insjpanning van Marc Verblakt is dit TVK-leidje d’r toch in 2023 gekómme. Wo ’t euver moosj gaon? “Maak neit oet, es de bass mer hel genóg is”. Tja, dao kènste opzich natuurlik ouch get op make.
Koeplèt 1:
Veer gaon blaoskapelle besjtèlle en eine D.J. van eine vent
Dus vanaovend trille de lelle van dien ore hie in de tent
Gein triangels en gein viole en ouch ’t klarinètje verdween
Dikke basse zeen ós idole dus vergeit dich heure en zeen
En doe vuils ’t door dien hoed
En waat maak ’t noe toch oet veur dae eine keer…
Refrein:
Veer wille helle decibelle
Van ein bas en trómmelvelle
En ’t leifste van die sjnelle
Zèt de sjuuf mer lekker aop…
Veer wille helle decibelle
Door ‘t vel pès in ós celle
Laot de beats mer röstig zjwelle
Zèt de sjuuf mer lekker aop…
Koeplèt 2:
Laot de drumtoesjtèlle mer helle en vastelaovend dae is de bóm
Waat gebeurt is zo te veursjpelle: dikke dansvloervöllesj alóm
En doe vuils ’t door dien hoed
En waat maak ’t noe toch oet veur dae eine keer…
Brök:
Sjtuukwerk ruzelt nao ónger
’t Tapeet krölt van de moer
Deze aovend gaon veer same door de vloer…
Danse op de wei
Stan & Sám zónge mit in ’t achtergróndjkoor van Claire en hólje zich aanbevaole veur ein zomer nummer. Al die Limburgse festivals. Ich weit neit of ’t al èns eerder bezónge woord.
Koeplèt 1:
Is de zón weer opgesjtoan
Dan veulste ’t geliek
De winterkouw hat aafgedoan
Vuër de swingende meziek
Dus neet gewach en flot van hoes
De kaertjes op de tesj
Vuër Solar of vuër Moulin Blues
Of ós eige OLS
Refrein:
Dan goan veer danse op de wei
Ós beste vrung die sjtoan ós bei
Op punk of op pop, funcky funk of op rock
Of galmp de polka door de lóch
Doa klinkt vanalles euveral
Op eder Limburgs festival
Dae folk en hiphop lokt ’t volk weer volop op noa de wei
Dus kóm mer op want v’r zitte hei!
Koeplèt 2:
Bospop of ‘t Zomerpark
Vier kómme d’r weer aan!
’t Graas dat ligk al aangehark
Dalik buldert de orkaan
’t Guuëf hee geine “Candlelight”
Mer soul en ruige rock
Want Groove Garden en Mamas Pride
Is waat ederein hee lok
Bridge:
Urpop!.. Sint Rosa!.. Park City Live!.. Pop on Top!.. Jera on Air!..
Stereo Sunday!.. Op Dreef!.. Essential!..
Pinkpop!.. Pinkpop!.. Pinkpop!.. Pinkpop!..
Plaatsj: | Haelder (Heerlen) |
Teks & Meziek: | Thei Wessels |
Zangk: | Stan & Sám |
Zèng mit mich…
In jannewarie 2022 moosjte Anne-Marie en ich oze pap laote gaon. Ich höb ummer leidjes euver gekkigheid gemaak. Serieuze thema’s kreeg ich lestig oet de pen. In de waeke nao de begrafenis maakde ich dit leidje. Euver wie veer es kènjer drek nao de krismes thoes al de aw Zittesje vastelaovesleidjes leerde mit behulp van de singelkes van de Marotte en de vergaelde blaedjes mit tekste. Es emes d’r neit mee is dan zuike de luuj die wiejer gaon mit laeve urges troos in. Mesjiens kènt dit leidje dat ouch veur uch es vastelaovesvierder beije.
Naodat ich dit leidje zelf haw gezónge tiejes de leidjesaovend van de Marotte in 2023 höbbe veer ’t leidje laote opnummer bie Marlstone. Paul-Jean Jessen wól dat gaer inzènge. Chiel Webers maakde eine geweldige Clip wo in gerefereierd wurd nao de dia’s die mam ummer maakde en die veer es kènjer väöl thoes dreede. Mit name de dia’s van de vastelaovend koume ummer ruum aan bod. ’t Leidje góng in november 2024 daoróm opnuut in ‘release’.
Koeplèt 1:
Veer dreede vruiger plaetjes bie ós thoes
En zónge mit de blaedjes in de voes
Waat höbste ós väöl bie gebrach
Verhaole pès de lètste nach
Doe góngs inèns op reis
Noe mis ich dit ‘t meis…
Refrein:
Zèng mit mich èns euver vastelaovend
Zèng vandaag nog eine keer mit mich
Och waat deit ‘t pien op deze aovend
Op ‘t Kirkplien went dan dènk ich ummer aan dich
Same klinke veer neit sjlech
Zo zèng ich mien traone weg
Doe viers vastelaovend dao
Ich doon dich hie in Zitterd nao
Koeplèt 2:
Al waat ich van dich kèn is euveral
Wo ich in Zitterd bèn klink diene kal
Doe goufs ós al de leidjes mit
Wo kaer van sjpas en lol in zit
Waat wunsjde veer ós meer
Kóm, veuroet, nog eine keer…
Sjlot:
Van ós vergaelde leidjes en auw weurd
En note die me neit meer urges heurt
Zal ’t dao baove wemele
Sins dats doe bès gaon hemele
Plaatsj: | Zitterd |
Teks & Meziek: | Thei Wessels |
Zangk: | Paul-Jean Jessen |
Media: | "Van Eijsde tot de Mookerhei" Deel 31 (Marlstone C202401, 2024) |