Jaorgank: 2019
1, 2, 3 Vastelaovend
Alweier de zoväölste samewirking mit nuuj zengesj. En mit sukses. In 2018 haw ich ’t al same mit Maxime Tummers en Thierry Dirkx tiejes de leidjesaovend d’reuver óm same ein leidje te gaon doon. Neit zomer ein toegesjaove nummer mer ech ein leidje dat bie hun zou passe. In april van 2018 haw ich meziek vaerdig en mit de feedback euver d'n teks wirkde ich ein nuut thema oet. Nao (bès waal väöl) rippeteiere knalde Sjtóm toeval dit leidje nao de eesjte plaatsj. Miene 9e Marottesjlager. Op nao de 11!
Koeplet 1:
Veer tèlle hie van ‘1, 2, 3’
En dan is ‘t laeve al dao
Ein dansmarie, ein hermenie
Die danse veer noe achternao
‘Kènt-ummer-nog’ hingk in de lóch
De zin in ein feeske óntloek
Drie tèlle mer dat is genóg
Dan vuilste ’t in diene boek:
Dae kriebel-iebel-iebel-iebel hie ) 2x
Refrein:
Dan is ‘t 1, 2, 3…vastelaovend
En veer zeen wie gekke zo blie
Allein mer 1, 2, 3…vastelaovend
En veer kómme ech neit meer bie
Es hie mit sjmaak wurd laam gemaak
En de richtige sjnaor wurd geraak
Dan is ’t 1, 2,3…vastelaovend
En veer gaon kómpleet oet ós daak
Koeplet 2:
De tróm geplek, de träöt gezóch
Dan waere die nog èns gebroek
Drie tèlle mer dat is genóg
Dan vuilste ’t in diene boek:
Dae kriebel-iebel-iebel-iebel hie ) 2x
Brök:
Sjus waar hie nog niks te belaeve
Vervaeling dae loug oppe loer
Mer ein moment en de ganse tent
Sjteit te danse op de vloer…
Plaatsj: | Zitterd |
Teks & Meziek: | Thei Wessels |
Zangk: | Sjtóm toeval - Maxime Tummers & Thierry Dirkx |
ZVK 2019: | 1e - Marottesjlager 2019 |
LVK 2019: | Finale 17e |
Media: | "1, 2, 3 vastelaovend" (Onger Os 7616) |
Laot ós mer sjuve
Koeplet 1:
Nog effekes wachte dan kómme ze aan:
De zate hermenie van weit-ich-wie
Zo valsj es de nachte en vaal is de vaan
Hun laeve kump al langzaam korterbie
En dalik sjtaon ze urges veur ein deur
Dan ruip dao eine: “Kael, die gaon derveur”…
Refrein:
Noe laot ós hie nao bènne gaon
Noe laot ós hie nao bènne sjtuve
De ganse kraom geit oppe tuppe sjtaon
Waat ouch gebeurd: Laot ós mer sjuve
‘t Knäörend iezer löp veurop
Ein hermenie mit bóntje kuve
De ganse kraom zingk alles oet de kop
Waat ouch gebeurd: Laot ós mer sjuve
Koeplet 2:
Ventiele en pómpe die waere al heit
En jederein wurd sjor van zien geblaer
Me blees óm ‘t lómpe zo hel es mer geit
Wae zingk dao in die bende euver haer?
En dalik blaoze veer zónger bezey
Nog èns “Van Eijsde tot de Mokerheij”…
Brök:
En höbs doe toevallig ouch zo’n nummerkes-pertie
Dan maagste noe veur effekes bie ós derbie…
Sjlot:
Noe laot ós mer sjuve
Plaatsj: | Zitterd |
Teks & Meziek: | Thei Wessels |
Zangk: | Jesse & Jesse |
LVK 2019: | Finale 14e |
Media: | "Van Eijsde tot de Mookerhei" Deel 26 (Marlstone CDL1901, 2019) |
Es de sjpas dich kump haole
Koeplèt 1:
Mesjiens höbste niks in de gate
Wat zo aeve mit dich is gebeurd
Dus renne dat zal neet meer bate
En doe mirks ’t geliek aan dien weurd
Dae kramp óm de mónd
Maak ‘t köpke gezónd
En dae hulp taege doezende kwaole
Refrein:
Es de sjpas dich kump haole
Nou dan bèste derbie
Nae dan hulp gein gemeek
Gein gebäök of gesjmeek
Mer doe veuls ’t al in dien prie
Es de sjpas dich kump haole
Blief de lach neet versjaole
Bie egaal wat me zaet )
Eine vlook of gebaed ) 2x
Es de sjpas dich te graze haet )
Koeplèt 2:
En móste èns janke of griene
Went dao zit dich al waeke get dwaesj
Dan sjtop en kóm oet de gerdiene
Noe wurd eesj eine lach d’roet gepaesj
En wooste ouch zits
Dich d’r taege verbits
Mer de lolligheid haet al bevaole…
Dat de sjpas dich kump haole…
Brök:
Dat zeure zaege zeivere en gejengel
Dat jage veer geliek noe oet diene prengel, bengel...
Plaatsj: | Sjömmert (Schimmert) |
Teks & Meziek: | Thei Wessels |
Zangk: | Kelly van de Lump (Kelly Limpens) |
LVK 2019: | Hauve finale |
Media: | "Van Eijsde tot de Mookerhei" Deel 26 (Marlstone CDL1901, 2019) |
TISNEITNIKS
Koeplet 1:
Es veer boete mage renne houf d’r nemes mee te penne
En dan doon veer ‘vastelaovend’ zo derbie
Mer wie móste zo get plenne? Is de vraog die nog blif brenne
Nae dat höbbe veer nog lang neit op ein rie
Refrein:
TISNEITNIKS óm vastelaovend hie te viere
Daoróm doon veer allemaole goud ós bès
Bie ’t danse en ’t zjwiere. ’t Zènge en de res
En veer kriege oppe sjool al extra lès
TISNEITNIKS veur ós es ganse nuuj sjoliere
Van de gekste en de leukste weitensjap
En ós juffe sjtaon te giere. Die höbbe ’t gesjnap
Zaet de mam, zaet de mam, zaet de mam en ouch de pap
Koeplet 2:
Mer noe kiek èns wie veer zjweite op de vastelaovesfeite
En de res dat wurd op ‘Goegel’ opgezóch
Went doe mós ’t toch mer weite. Mer veer höbbe kwaliteite
Oze Cito-score is vas hoog genóg
Brök:
Noe doon veer hie niks angesj mee es traene
‘t Raekene en taal geit noe opzie
’t Sjoonste is ein lies mit èllef tene
Mer wie? Mer wie? Mer wie?
Sjlot:
Cum laude kómme veer dan veur d’n daag:
Gesjlaag! Gesjlaag! Gesjlaag!
Plaatsj: | Zitterd |
Teks & Meziek: | Thei Wessels |
Zangk: | Sjtadssjool Zitterd – KVL 2019 |
Finale KVL 2019 | Marotte Kènjerleidje 2019 |
Doog ’t noe
Koeplèt 1:
Doe meid doe höbs ambisie
Mer de twiefel haet de mach
Noe volg dien intuisie
En vertroew dien eige krach
Noe dènk neit waat d’r mörge kump
Mer aan noe en dit moment!
Refrein:
Doog ’t noe. Doog ‘t noe
Neit zo sjoew dat is de kloe
Doog ’t noe. Doog ‘t noe
Veur datste ‘t wits is alles toew
Went echte sjpiet kump ummer later
Dus woróm geine gok gewaag?
Doe kumps toch ummer baove water
Dus doog ‘t lever nog vanda-da-daag
Doog ’t noe. Doog ‘t noe
Neit zo sjoew dat is de kloe
Doog ’t noe. Doog ‘t noe
Veur datste ‘t wits is alles toew
Koeplèt 2:
Och meid waat bèste keurig
En de aovend is ein feit
Noe kiek mit mich rooskleurig
Wie de nach aafloupe geit
Noe dènk neit waat d’r mörge kump
Mer aan noe en dit moment!
Brök:
Al geit ‘t neit zo lekker
Gedraag dich dan ein bietje gekker
Es diene lach teveursjien kump
Wurd al ‘t sjlechte oetgegump
Plaatsj: | Zitterd |
Teks & Meziek: | Thei Wessels, Thierry Dirkx / Thei Wessels |
Zangk: | Thierry Dirkx |